Më 8 maj 2025, në ambientet e ish Kinema “Agimi”, u zhvillua Asambleja e Përgjithshme e agjencisë Albautor, e thirrur nga Këshilli Drejtues, në prani të noterit znj. Lora Xhaja.

Çështjet e Diskutuara

Gjatë mbledhjes u trajtuan çështjet kryesore që prekin funksionimin e Albautor dhe fushën e të drejtës së autorit në Shqipëri:

• Raporti mbi të ardhurat dhe shpenzimet për vitin 2024;
• Rezultati tejet negativ i vitit 2024, i shkaktuar nga mosmbledhja e të ardhurave prej Sportelit Unik SUADA, duke cenuar të drejtat ekonomike të anëtarëve të agjencisë Albautor;
• Kërkesa për rikthimin e funksionit të mbledhjes së tarifave të shpërblimit tek agjencitë e administrimit kolektiv, pas dështimit disavjeçar të Sportelit Unik;
• Shqyrtimi dhe miratimi i një peticioni drejtuar autoriteteve shtetërore;
• Nevoja për ndërhyrje ligjore dhe institucionale të menjëhershme.

Peticioni

Asambleja vendosi dërgimin e një peticioni drejtuar Ministrit të Kulturës, z. Blendi Gonxhja, i cili përqendrohet në dy pika kryesore:

1. Shfuqizimin e nenit 138 të Ligjit nr. 35/2016, i cili parashikon krijimin dhe funksionimin e SUADA-s;
2. Rikthimin e së drejtës së mbledhjes së tarifave të shpërblimit tek agjencitë e licencuara të administrimit kolektiv, sipas praktikave më të mira evropiane.

Nga të gjithë të pranishmit u theksua nevoja që, si alternativë ndaj modelit të centralizuar të mbledhjes së shpërblimeve, të rikthehet modeli i mëparshëm, ku vetë agjencitë e administrimit kolektiv kryenin mbledhjen e të ardhurave në interesin më të mirë të anëtarëve të tyre. Ky model vlerësohet si një zgjidhje në përputhje me praktikat më të mira evropiane.